За молитвата „Господи, помилуј!“ - Свети Николај Велимировиќ

Дали сакате да знаете за употребата и моќта на оваа молитва? Кажете го тоа за себе и за другите. Извикајте како слепиот Вартимеј: „Господи, помилуј ме!  Марко 10:47); извикај со десетте лепрозни: „Исусе Наставниче, смилуј се!” (Лука 17:13). Молете се за себе, молете се за сите.

Ти се молам, Господи, за себе, роден во немоќ: Господи, помилуј ме! А за сите родени во немоќ: Господи, помилуј нѐ!

Јас станав плен на светот и го прекршив Твојот животворен закон: Господи, помилуј ме! И се молам за сите кои го прекршиле Твојот закон: Господи, помилуј нѐ!

Денеска и утре сум Твој гостин на овој свет и наскоро ќе минам како сенка и ќе им се придружам на заминатите: Господи, помилуј ме! А за сите умрени во вера, Ти се молам: Господи, помилуј нѐ!

Господи, помилуј ги властодршците, трипати Ти се молам за нив, зашто тие се во опасност да станат насилници.

Господи, помилуј ги богатите; Ти се молам трипати за нив, зашто се во опасност да станат развратни.

Господи, помилуј ги сиромашните и сираците; Ти се молам трипати за нив, зашто се во опасност да паднат во очај.

Господи, помилуј ги богатите со световно знаење; Ти се молам трипати за нив, зашто тие се во опасност да се обожат себеси и да Те заборават.

Кој и да се сеќавате додека стоите во молитва, мртов или жив, воздивнете: „Господи, помилуј!

Ако се сеќаваш на својот непријател, кажи: „Господи, помилуј!

А каква е моќта на овие зборови, ќе ви каже слепиот Вартимеј: „Бев слеп и видов!

Лепрозниот ќе ви каже: „Бев лепрозен и се очистив!

Опседнатиот ќе ви каже: „Бев лут и сега се вразумив!“

Парализираниот ќе ви каже: „Бев болен и оздравев!

Покојникот ќе ви каже: „Бев мртов и оживеав!

Апостолите ќе ви кажат: „Бурата беше и помина!“

Грешникот ќе ти каже: „Згрешив и ми е простено!

Крадецот на Крстот ќе ви каже: „Направив беззаконие и прв се најдов во рајот!