Молитви пред Света Причест и Благодарствени молитви по Света Причест

 Молитви пред Света Причест и Благодарствени молитви по Света Причест

"Молитви пред Света Причест"

Молитва прва

Владико, Господи Исусе Христе, Боже наш, Извору на живот и бесмртност, Создателу на сета видлива и невидлива твар, совечен и собеспочетен Сине на беспочетниот Отец; Ти, Кој заради безмерната добрина, во последните денови во плот се облече, се распна и беше погребен заради нас, неблагодарните и неразумните, и со крвта Своја ја обнови нашата природа, во грев пропадната; Сам Ти, бесмртен Цару, прими го покајанието од мене грешниот, приклони го увото Твое кон мене и слушни ги зборовите мои: „Согрешив Господи, му згрешив на небото и пред Тебе и не сум достоен да погледнам во висините на славата Твоја, отстапувајќи од заповедите Твои и не слушајќи ги заповедите Твои!“ Но Ти си, Господи, незлоблив, долготрпелив имногумилостив, и не си ме предал да загинам во беззаконијата мои, секогаш очекувајќи го моето обраќање; зашто си рекол Човекољупче преку Твојот пророк: „Не ја сакам смртта на грешникот, туку да се обрати и жив да биде“. Не сакаш, Владико, делото на рацете Твои да го погубиш, ниту ја благоволиш човечката пропаст, туку сакаш сите да се спасат, и да дојдат во познание на Вистината. Затоа и јас, иако сум недостоен за небото и за земјата, па и за овој привремен живот, самиот себеси потчинувајќи му се на гревот и на сластите робувајќи им, и Твојот образ сквернавејќи го, сепак, Твое творение и создание сум, и не очајувам за своето спасение, јас бедниот, и дрзнувајќи се на Твоето безмерно милосрдие, приоѓам. Прими ме затоа и мене, човекољубив Господи, како блудницата, како разбојникот, како митарот и како заблудениот син, и земи го моето тешко бреме гревовно – Ти, Кој ги земаш гревовите на светот и немоќните човечки ги исцелуваш; Ти, Кој ги повикуваш измачените и обременетите при Себе и покој им даваш и Кој не си дошол да ги повикаш праведните, туку грешните на покајание. Очисти ме од секоја скверност на плотта и духот и научи ме да ја извршувам Светињата во страв Твој, та со чисто сведоштво на совеста моја да примам дел од Светињите Твои. Да се соединам со светото тело и крв Твоја и да Те имам Тебе жив, и во мене да престојуваш со Отецот и Светиот Твој Дух. Да, Господи Исусе Христе, Боже мој, нека не ми биде за осуда причествувањето со пречистите и живототворни Твои Тајни, ниту да изнемоштам со душа и тело, зашто недостојно се причестувам со нив, туку дај ми сè до конечното издихание мое, неосудено да примам дел од Светињите Твои, за заедницата со Светот Дух, на страшниот Твој суд. Та и јас со сите избрани Твои да бидам заедничар на Твоите неминливи блага, што си ги приготвил за оние кои Те љубат, Господи, во кои си препрославен вечно. Амин.

Молитва втора

Знам, Господи, дека недостоен се причестувам со пречистото Твое тело, и чесната крв Твоја; и виновен сум и судот свој го јадам и пијам, не разликувајќи го телото и крвта, на Тебе, мојот Христос и Бог. Но се осмелувам заради штедроста Твоја и пристапувам при Тебе, Кој си рекол: „Кој го јаде Моето тело и ја пие Мојата крв, во Мене живее и Јас во него.“ Затоа, смилувај се Господи, и не отфрлај ме мене грешниот, туку стори со мене по милоста Своја. За да ми бидат овие Светињи за исцеление, за очистување, за просветлување, за запазување, за спасение и за осветување на душата и телото мое, за изгонување на секакво мечтаење, и лукаво делање и дејство ѓаволско, кое со помисли делува во моето тело; за смелост и за љубов кон Тебе, за исправање и утврдување на мојот живот, за пораст на секоја добродетел и совршенство, за исполнување на заповедите, за заедница со Светиот Дух, за попатнина кон вечниот живот и за благопријатен одговор на Твојот страшен суд; а не за суд или осуда.

Молитва трета

Боже, отпушти ги, остави ги и прости ми ги согрешенијата мои, со кои Ти згрешив, со збор, дело, или помисла, волно или неволно, разумно или неразумно, сè прости ми како Благ и Човекољубец. И по молитвите на Твојата Пречиста Мајка, бесплотните Твои служители, светите сили, и сите светии, кои отсекогаш Ти благоугодуваат, благоволи неосудено да го примам Твоето свето и пречисто тело, и чесната Твоја крв, за исцеление на душата и телото, и за очистување на моите лукави помисли. Зашто Твое е царството, и силата и славата; со Отецот и Светиот Дух; сега и секогаш и во сите векови. Амин.

Молитва четврта

Не сум достоен, Владико Господи, да влезеш под покривот на душата моја. Но бидејќи, како Човекољубец, Ти сакаш да живееш во мене, дрзнувајќи се пристапувам; повелаш, и ги отворам дверите кои Ти единствен ги создаде, за да влезеш со човекољубието Каков што си; да влезеш и да го просветиш помрачениот мој разум. Верувам дека ќе го сториш тоа, зашто не ја одби блудницата која со солзи Ти пристапи, ниту го отфрли митарот кој се покаја, ни разбојникот кој го позна Царството Твое, ни покајаниот гонител не го остави каков што беше, туку сите кои со покајание Ти пристапија ги вброи во редот на пријателите Твои; Ти, Кој си единствен благословен секогаш, сега и во бесконечни векови. Амин.

Молитва петта

Господи Исусе Христе, Боже мој, отпушти ги, остави ги, очисти ги и прости ми ги, мене грешниот, и непотребниот и недостојниот слуга Твој, прегрешенијата, беззаконијата и гревовните падови мои, кои од младоста, па сè до денешниов ден и час Ти ги согрешив, разумно или неразумно, со зборови или со дела, со помисли, со мисли или со настојанија и со сите мои чувства. По молитвите на Онаа, Која бессемено Те роди, Пречистата и Приснодева Марија – Твојата Мајка, единствената непостидна надеж и застапништво и спасение мое, удостој ме неосудено да се причестам со Твоите пречисти, бесмртни, живототворни и страшни Тајни, за прошка на гревовите и за живот вечен; за осветување и просветување, за крепост и исцелие и за здравје на душата и телото, за истребување и потполно погубување на моите лукави мисли и помисли, и потфати и ноќни мечтаења, од мрачните и лукави бесови; зашто Твое е царството, и силата и славата; и честа и поклонувањето; со Отецот и Светиот Твој Дух, и сега и секогаш и во бесконечните векови. Амин.

Молитва шеста

Верувам, Господи, и исповедам дека Ти си навистина Христос, Син на живиот Бог, Кој дојде во светот за да ги спасиш грешните, од кои прв сум јас. Уште верувам дека ова е самото Твое пречисто тело и ова е самата Твоја чесна крв. Затоа Ти се молам, смилувај се на мене и прости ми ги прегрешенијата мои, волни и неволни, направени со збор и со дело, со знаење и незнаење; удостој ме неосудено да се причестам со пречистите Твои Тајни, за прошка на гревовите и за живот вечен. Амин.

Благодарствени молитви по Света Причест

"Благодарствени молитви по Света Причест"

Слава Ти, Боже! Слава Ти, Боже! Слава Ти, Боже!

Молитва прва

Ти благодарам Господи, Боже мој, што не ме отфрли мене грешниот, туку ме удостои да бидам причастник на Твоите Светињи. Ти благодарам, што мене недостојниот ме почести да се причестам со пречистите и небесни Твои Дарови. Но, човекољубив Владико, Ти, Кој заради нас умре и воскресна, и овие страшни и животворни Тајни ни ги даде, за добро и осветување на нашите души и тела, нека и мене тие ми бидат за исцеление на душата и телото; за одбивање на секој противник, за просветување на очите на моето срце, за мир на моите душевни сили, за вера што не посрамотува, за нелицемерна љубов, за исполнување со премудрост, за запазување на Твоите заповеди, за умножување на божествената Твоја благодат и за добивање на Царството Твое; та со нив сочуван во светоста твоја, секогаш да си спомнувам за Твојата благодат, и веќе да не живеам за себе, туку за Тебе, Владико и Добротвору наш. И напуштајќи го овој живот, со надеж на живот вечен да стигнам во севечниот покој, таму каде што е непрестан гласот на оние што празнуваат и бескрајна е сладоста на оние што ја гледаат неизговорливата убавина на Твоето лице. Зашто Ти Си вистинска желба и неизговорлива радост на оние, што Те љубат, Христе Боже наш, и Тебе Те воспева сета твар, вечно. Амин.

Молитва втора

Владико, Христе Боже, Цару на вековите и Создателу на сета твар, Ти благодарам за сите добрини што Си ми ги дал и за причестувањето со Твоите пречисти и животворни Тајни. Те молам Тебе, Добар и Човекољубив, запази ме под покровот Твој и во сенката на Твоите крилја. И дај ми со чиста совест, до конечното издихание мое, достојно да се причестувам со Твоите Светињи, за прошка на гревовите и за живот вечен. Зашто Ти си Лебот на жиотот, Изворот на осветувањето, Дарителот на добра и Тебе слава Ти вознесуваме, со Отецот и Светиот Дух; сега и секогаш и во сите векови. Амин.

Молитва трета

Создателу мој, Кој доброволно Своето тело за храна ми го даде, Кој си оган што ги спалува недостојните – не спалувај ме, туку продри во мојата утроба, во секој мој состав и секој зглоб, во внатрешноста и во моето срце. Спали го гревовното трње на беззаконијата мои, душата моја очисти ја, мислите освети ги, зајакни ги составите со коските, просвети ги петте мои прости сетила и оковај ме сиот во стравот Твој. Секогаш покривај ме, штити ме и чувај ме од секој душегубен збор и дело. Очисти ме, измиј ме, украси ме, разубави ме, вразуми ме и просвети ме. Покажи ме Твој дом на единствениот Дух, и никогаш повеќе дом на гревот. Та со влегувањето на светата Причест во мене, како во дом Твој, да бега како оган секој злотвор и секоја страст. За застапници Ти ги приведувам сите светии и Твоите бестелесни сили, Претечата Твој, премудрите апостоли и уште Твојата беспрекорна и пречиста Мајка. По нивните молитви, милосрден Христе, прими ме и мене, слугата Твој, и направи ме син на светлината. Зашто Ти Си Благи наше осветување, и единствена светлост на нашите души, и Тебе, како што доликува, слава Ти вознесуваме секој ден, како на Бог и Владика.

Молитва четврта

Господи Исусе Христе, Боже наш, Твоето свето тело нека ми биде за вечен живот, и пречесната крв Твоја за прошка на гревовите. Ова причестување нека ми биде за радост, за здравје и за веселие; и на Твоето второ и страшно пришествие, удостој ме мене грешниот да застанам од десната страна на славата Твоја, по молитвите на Пречистата Твоја Мајка и сите светии. Амин.

Молитва петта

Пресвета Владичице, Богородице, светлино на мојата помрачена душа, надеж моја, заштито, прибежиште, утехо и радост моја; ти благодарам што мене недостојниот ме удостои да бидам причасник на пречистото тело и пречесната крв на Синот твој. ти, која ја роди вистинската Светлина – просвети ги духовните очи на моето срце. Ти, која го роди Изворот на бесмртноста – оживеј ме мене умртвениот од гревови. Ти, која си милосрдна мајка на милостивиот Бог – смилувај се на мене и дај ми умиление и скрушеност во срцето, и смиреност на мислите, и враќање од ропството на помислите мои. И удостој ме сè до последното мое издихание неосудено да го примам осветувањето со пречистите Тајни, за исцеление на телото и душата; и дај ми солзи на покајание и исповед, за да те воспевам и славам во сите денови на мојот живот, зашто Ти си благословена и прославена во сите векови. Амин.

И оваа молитва

Сега го отпушташ во мир слугата Свој, Владико, според зборовите Твои; зашто го видоа очиве мои спасението Твое што си го приготвил пред лицето на сите народи; светлина за просветување на незнабожците и слава на Твојот народ – Израилот.

извор: Кумановско-осоговска епархија