Света Лидија Македонска

Житие на Света Лидија : Света Лидија е родена во Тијатир (денешен Ак-Хисар), во Мала Азија, во првиот век. А во она време градот Тијатир беше познат по бојаџилниците. Па и оваа богобојазлива Лидија, како што се нарекува во Делата Апостолски (16, 14), беше продавачка на пурпурни ткаенини и бои кога стана прв човек во Филипи, во Македонија (па и во Европа), кого светиот апостол Павле го обрати во верата. За своето доаѓање во Македонија првиот проповедник на Евангелието за незнабожците беше поттикнат од Светиот Дух во видение. Бидејќи, кога апостолот и браќата што беа со него дојдоа во Мизија, се обидоа да отидат во Витинија, но Духот не ги пушти. И кога ја напуштија Мизија, слегоа во Троада. Преку ноќта Павле имаше видение: стоеше пред него еден човек, Македонец, кој го молеше и му велеше: ’Премини во Македонија и помогни ни!’ ... (Дела 16, 7 – 9). Надвор од градот Филипи при една река, сведочат апостолите во Делата Апостолски, беше едно место каде што доаѓаа од градот оние што имаа обичај да се молат. Меѓу таму насобраните жени Господ ? го отвори срцето на богобојазливата Лидија да внимава на зборовите Павлови. А кога се крсти таа и целиот нејзин дом, ги молеше кај неа да живеат Павле и оние што го придружуваа (апостолите Сила и Тимотеј), велејќи: „Ако сте ме признале за верна на Господа, тогаш влезете и живејте во мојата куќа.” (Дела 16, 15). Семејството на Света Лидија и домот на затворскиот стражар пред кого, по молитвите на светите апостоли Павле и Сила, се изврши чудото на отворањето на затворот во Филипи (Дела 16, 26), се првите никулци на Христовата Црква на македонска почва, која оттогаш, по молитвите на апостолите и на оние што по нивните зборови се обраќаа во Христовата благодат, низ многу страдања и искушенија со векови расне и принесува изобилен плод по сите македонски краишта.

 Тропар на светата Лидија Македонска

27 март / 9 април

Гостопримство радост неискажлива донесе,

кога не луѓе туку ангели во домот твој прими

о Лидијо Филипијанко, а преку нив Христос

срцето ти го исполни, душата развесели,

и домот твој, дом на обручение за Бога постана

о Македонко која ја превознесе

Господовата слава и пофалба.

Радувај се мајко наша која духот

на Павла – великиот кој Бога го прославува,

во една молитва го искажа

за спасение на сите кои поверуваа.

Извор МПЦ – ОА

Молитва кон Света Лидија Македонска О Света Рамноапостолска Лидија, топол молитвеник за нас пред Бога! Со вера и љубов трчаме кон тебе и се молиме: биди наш помошник во се за добро, помогни ни да ги просветлиме нашите умови и срца со светлината на Евангелието Христово, да напредуваме во верата, побожноста и љубовта од Господ. Испроси за нас од Пречистиот Бог се што е добро и корисно во животот на времето и вечноста, да Му угодиме на Бога овде, да се удостоиме за наследување на вечните благослови во Царството Небесно, Христос нашиот Бог, на Него со Отецот и Светиот Дух сета слава, чест и поклонување секогаш, сега и секогаш и во вечни векови, Амин.